महोत्तरी । मधेश प्रदेशमा विश्व कुष्ठ रोग दिवस मनाइएको छ । आइतबार विराट नेपाल मेडिकल ट्रष्ट बीएनएमटी नेपाल, मधेश प्रदेश स्वास्थ्य निर्देशनालय, धनुषा र महोत्तरी जिल्ला स्वास्थ्य कार्यालय, बलवा नगरपालिकासहित विभिन्न स्वास्थ्य सम्बद्ध संघसंस्थाहरूको सहकार्यमा सचेतना तथा सेवा प्रवाहसम्बन्धी कार्यक्रम गरी कुष्ठ रोग दिवस मनाइएको हो ।

यसै दिवसको अवसर पारेर माघ ९ गतेदेखि विभिन्न कार्यक्रमसमेत गरिएको थियो । महोत्तरीको बलवामा कुष्ठ रोगसम्बन्धी अभिमुखीकरण, घरदैलो कार्यक्रम, स्क्रीनिङसहित शंकास्पद कुष्ठ रोग केसहरूको पहिचान गरिएको थियो । त्यसक्रममा बलवाको गाउँघरमा  सचेतना पुर्‍याई योगदान दिने दुई कुष्ठ रोगीलाई सम्मान पनि गरिएको थियो ।

साथै, दुई कुष्ठ रोगीलाई चामल, दाल, चना, पिठो, सेवाबीन, तेललगायत खाद्य सामग्री पनि प्रदान गरिएको बीएनएमटी महोत्तरीका संयोजक डा. मनोजकुमार साहले जानकारी दिनुभयो । त्यस्तै, माघ १० गते जनकपुरधाममा स्वास्थ्य निर्देशनालयले गरेको कार्यक्रममा मधेश प्रदेशमा कुष्ठरोगको वर्तमान स्थिति, प्रमुख चुनौतीहरू र प्रदेश सरकारले कुष्ठ रोग नियन्त्रण तथा उन्मूलनमा निर्वाह गरेको भूमिका विषयमा जानकारी दिइएको थियो ।

यी  गतिविधिहरूले समुदायमा आधारित, एकीकृत हस्तक्षेपहरूको प्रभावकारिता देखाउँदै कुष्ठरोगको प्रारम्भिक पहिचान सुदृढीकरण, सामाजिक ला‌‍ञ्छना र विभेद न्यूनीकरण र प्रभावित व्यक्तिहरूका लागि गुणस्तरीय तथा समावेशी सेवामा पहुँच सुनिश्चित गर्न सरकार, समुदाय र विकास साझेदारहरूबीचको सहकार्यको महत्वलाई उजागर गर्ने डा. साहले बताउनुभयो ।