अमेरिकी राष्ट्रपति डोनाल्ड ट्रम्पले इरानलाई पुनः सैन्य कारबाहीको कडा चेतावनी दिएका छन्। खाडी क्षेत्रमा अमेरिकाले आफ्नो सैन्य उपस्थिति बढाइरहेका बेला ट्रम्पको चेतावनीपछि अमेरिका–इरानबीचको तनाव थप चर्किएको छ।

अमेरिकी राष्ट्रपति डोनाल्ड ट्रम्पले इरानले दुई महत्वपूर्ण सर्त पूरा नगरे सैन्य कारबाही हुन सक्ने संकेत दिएका छन्। खाडी क्षेत्रमा अमेरिकी सैन्य गतिविधि तीव्र बन्दै गएको सन्दर्भमा ट्रम्पले इरानप्रति कडा अभिव्यक्ति दिएका हुन्।

ट्रम्पका अनुसार पहिलो सर्त इरानले कुनै पनि हालतमा परमाणु हतियार विकास गर्न नहुने हो भने दोस्रो सर्त देशभित्र भइरहेका प्रदर्शनका क्रममा प्रदर्शनकारीहरूको हत्या तुरुन्त रोक्नुपर्ने हो। उनले इरानमा हालसम्म हजारौँ मानिस मारिएको आरोप समेत लगाएका छन्।

अमेरिकी राष्ट्रपति ट्रम्पले हाल अत्यन्त शक्तिशाली अमेरिकी युद्धपोतहरू इरानतर्फ अघि बढिरहेको दाबी गरेका छन्। ती युद्धपोत प्रयोग गर्न नपरोस् भन्ने आफ्नो चाहना रहेको उल्लेख गर्दै उनले चेतावनी बेवास्ता गरिए त्यसको परिणाम गम्भीर हुन सक्ने संकेत दिएका छन्।

ट्रम्पको चेतावनीपछि इरानले कडा प्रतिक्रिया जनाएको छ। इरानका विदेशमन्त्री अब्बास अराग्चीले देशका सशस्त्र सेनाहरू पूर्ण तयारी अवस्थामा रहेको बताएका छन्। उनले कुनै पनि किसिमको आक्रमण भएमा इरान तुरुन्तै र पूर्ण शक्तिका साथ जवाफ दिन तयार रहेको स्पष्ट पारेका छन्।

अराग्चीले इरानी सेनाका “औँला ट्रिगरमै” रहेको टिप्पणी गर्दै इरान आफ्नो सार्वभौमसत्ता र राष्ट्रिय सुरक्षामा कुनै सम्झौता नगर्ने अडान दोहोर्‍याएका छन्।

यस घटनाक्रमसँगै अमेरिका र इरानबीचको सम्बन्ध थप तनावपूर्ण बन्दै गएको छ। विश्लेषकहरूका अनुसार बढ्दो सैन्य गतिविधि र कडा चेतावनीका कारण मध्यपूर्व क्षेत्रमा सम्भावित सैन्य टकरावको जोखिम समेत बढ्दै गएको छ।