काठमाडौँ महानगरपालिकाद्वारा सबै वडामा निःशुल्क स्वास्थ्य सेवा संचालन

काठमाडौँ महानगरपालिकाले मेयर बालेन शाहको नेतृत्वमा “स्वास्थ्य सबैको अधिकार” भन्ने मूल मन्त्रका साथ ३२ वटै वडामा शहरी स्वास्थ्य प्रवर्धन केन्द्र स्थापनासहित निःशुल्क स्वास्थ्य सेवा प्रभावकारी रूपमा सञ्चालन गरेको छ।

महानगरको पहिलो वर्षमै पूर्वाधार विकासमा जोड दिइएपछि दोस्रो वर्षमा १ लाख २४ हजारभन्दा बढी नागरिकले सेवा लिएका थिए भने तेस्रो वर्षमा यो संख्या बढेर १ लाख ९४ हजार १९३ पुगेको छ। चालु आर्थिक वर्षको श्रावण र भदौ महिनामा मात्र ४१ हजार ९७१ जनाले सेवा लिइसक्दा यो वर्ष कम्तीमा २ लाख ५० हजार नागरिकले निःशुल्क उपचार पाउने अनुमान गरिएको छ।

मेयर बालेन शाहको पहलमा १० वटामा स्वास्थ्य बीमा कार्यक्रम लागू गरिएको छ। प्रत्येक केन्द्रमा MBBS चिकित्सकद्वारा दैनिक सेवा र विशेषज्ञ चिकित्सकद्वारा तालिकाअनुसार उपचार भइरहेको छ। आवश्यक परेमा सेवाग्राहीलाई सिभिल, वीर वा टिचिङ अस्पतालमा रेफरल गरिन्छ।

नागरिकलाई उपचार मात्र होइन, रोगप्रतिरोधात्मक स्वास्थ्यमा पनि जोड दिँदै बालेन शाहले ‘आरोग्य जीवन स्वर्णिम योजना’ मार्फत विद्यालय स्वास्थ्य शिक्षा, मानसिक स्वास्थ्य, दीर्घरोग नियन्त्रण, योग–आयुर्वेद, पोषण कार्यक्रम, खोप अभियानलगायत सेवा सुरु गरेका छन्।

२५० भन्दा बढी निःशुल्क औषधि, प्रयोगशाला, रेडियोलोजी, फिजियोथेरापी, मातृत्व सेवा र एकीकृत एम्बुलेन्स सेवा समेत उपलब्ध छ।
मेयर बालेन शाहले भने, “निःशुल्क स्वास्थ्य सेवा नागरिकको हक हो, र त्यो सुनिश्चित गर्नु हाम्रो प्रतिबद्धता हो।”